سميرة المنصورى تكتب…غلطة

Posted on Updated on

سميرة المنصورى تكتب…غلطة

الغلطة ماشي منك..
الغلطة مني..
أنا للي اعطيتك العصا..
باش تضربني..
أنا للي هديتك السوط..
باش تجلدني
أنا للي قللت قدري
انا للي عوجت زهري
أنا للي ضيعت عمري
مللي ليك حنيت ظهري
وطيتِ..تعلّيتِ
فالطريق الممدوده
قدامك امشيتِ
ما التفتِّ
ما فكرتِ
فالظهر المحني
للي وراك خليتِ
اهجرتِ وما وليتِ
ما اشعرت بالقلب
للي عليه جنيتِ
ودابا راجع
ضارب الباب ودافع
لراية السلام رافع
كأنُّ شي ما واقع
قل لي آش بغيتي
راه ما شي أنا
ديك الهبيلة للي خليتِ..
راه ماشي أنا
ديك الصندالة
للي ارميتِ
امشات ايام وجات ايام
واجهت القوم
وكثرة الكلام
كابدت الهموم
تحملت الملام
جفاني النوم
هجرتني الاحلام
صبرت وكابرت
قاومت وعافرت
عضيت فاللحم الحيّ
ياك آخر الدوا كيّ
انحت الصخر بيدي
رميت خاتمك المصدّي
لبست خاتم على قدّي
والحمد لله
وقفت ثاني على رجلي
لميت اشتاتي
جمعت شملي
رفعت من جديد راسي
ورجعت نعيش
بين اهلي وناسي
قطعت لباسك
ولبست لباسي
فصلته هاد المرة
على قياسي
ودابا
دابا راجع نادم
تبرر وتقول
للي فات
الله بيه عالم
كون تحشم يا بنادم
باراكا من الكدوب
الحيا من وجهك انعادم
رجعت
مللي ضربوك الحيوط
الجيب خاوي
زاوي مزلوط
الفم داوي
والريح عليك تسوط
لا شماتة ..الله كبير
غدرتِ ..
يسحاب لك ربحتِ
فرحتِ
تهورت ِ
وخسرتِ
وهاانت رجعتِ
كيف كنتِ
دابا غني مهمومة
تبع دبانة ونشّها
طيّر حمامة من عشها
بيع للميّمة قشها..
ربي كيخلف على الدومة
ما شي على للي حشها
******************
سميرة المنصوري

اترك تعليقًا

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار ووردبريس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s