الراجل والمرا بقلم سميرة المنصورى

Posted on Updated on

 

الراجل والمرا بقلم سميرة المنصورى

من نهار كانت الدنيا
والراجل راجل
والمرا مرا
الراجل يآمر ويتعنت
والمرا تطيع بحكرة
وخاّ كون ما حوّا
ما كانت تكمل البنية
ما كانت تثيث القدرة
علاش يا الراجل
كاويها بكية
شاويها بجمرة
علاش يا الراجل
ناسي فضل البطن للي حملاتك
فضل الثدي للي رضعاتك
فضل الليل للي سهراتو
وريحاتك
فضل الظهر للي عوجاته
وركباتك
علاش الحكرا
علاش القهرا
واش عرفت شحال من مرة
حيدت اللقمة من فمها وطعماتك
ضلات جيعانة حيت شبعاتك
واش حسبت شحال من ليلة
باتت سهرانة وقت فطماتك
بقات فجعانة حتى رضاتك
علاش الحكرا
علاش القهرا
نسيت شكون صبر
شكون سهر
شكون يتسنى رجوعك
من غيباتك
شكون يهز همك
ويحضر طلباتك
شكون يتفن في رضاك
ويلبي رغباتك
راها المرا
للي حملاتك
راها المرا
للي رباتك
و للي كبراتك
راها المرا
للي كملت معاك حياتك
وهمومك وفرحك
شاركاتك
منها جبت الذرية
بنياتك وليداتك
علاش الحكرة
علاش القهرة
لولايا ما كانت دروبك هانيا
ما كانت طريقك خضرا
من حضني صنعت لك السلام
من صوفي نسجت ليك الاحلام
من خوفي أمنت ليك الايام
لو كان نبضي قادر على الهضرة
كل كال كلام وكلام
كل كالك يا بنادم
راعي الله فالمرا
كل كالك
علاش الحكرة
وعلاش القهرة
كل كالك
خاصك تعرف
قبل ما تعجرف
وتبدا تخرف
وتققل من قيمة المرا
بللي مللي كا تقول
انت حفيد النبي
راك فالحقيقة كتقصد
حفيد الشريفة الحرة
حفيد فاطمة الزهرا
وفاطمة الزهرا
راها……مرا
******************
سميرة المنصوري

اترك تعليقًا

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار ووردبريس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s