نشرت تحت تصنيف الأم والطفل

حدوته قبل النوم….سيدنا ابراهيم و الملك النمرود

حدوته قبل النوم….سيدنا ابراهيم و الملك النمرود

اتولد سيدنا ابراهيم فى العراق
و لما بدأ يكبر لقى ان قومه عابدين للاصنام
لكن عقل سيدنا ابراهيم رفض انه يعترف بان الحجاره دى
 ممكن تكون قادره تحمى او ترزق حد
كان ابوه صانع للاصنام
فكان بيشوف ازاى التمثال بيتعمل
 فسأل نفسه ازاى اعمل حاجه بايدى
و بعدين اعبدها و مقتنع انها بترزقنى او تقدر تساعدنى …
و لما بدأ يسأل الناس رفضوا يسمعوه او يفكروا
و لان سنه كان صغير اعتبروه شاب طايش
و بدأ سيدنا ابراهيم يدور برغم سنه الصغير عن الحقيقه
 ساب الارض و بص للسما شاف نجمه بعيده منوره
 قال يمكن هى دى اللى خلقت الدنيا
بس لما النجم ضلم قال لا مش بحب اعبد حاجه بتضلم
و شاف القمر قال يمكن هو ده
بس لما القمر غاب دعا الله انه يهديه اليه و الا هيكون فى القوم الضالين
و شاف الشمس قال هى دى اكيد الرب لانها كبيره جدا
 فلما غربت تبرأ من كل اللى قومه بيعبدوه
ربنا هداه للحقيقه المطلقه
 و هى وجود الله الواحد الاحد
اللى خلق الكون و خلق الشمس و القمر و النجوم و الكواكب و الانسان
و الحيوان و كل حاجه ..
 و الحقيقه ان سيدنا ابراهيم ماعبدش الحاجات دى قد ما كان بيبحث عن الوجود الالهى بعقله و قلبه
و لان الناس من حواليه كانت بتعبد الشمس و القمر و النجوم و الاصنام
و لان هو رفض عباده التماثيل من الاول
 فكان كل اللى فات ده محاولات بحث
لكن لانه كان مخلص فى انه عاوز يوصل لربنا
ربنا هداه لوجوده ..
سيدنا ابراهيم استخدم عقله و قلبه و فطرته

 علشان يوصل
 و علشان كده ربنا رفعه لمرتبه عاليه جدا و
 بقى خليل الرحمن
و الخليل درجه من الحب من ربنا لعبد من عباده اختص بيها ابراهيم ..
 لان ربنا بيحب العبد اللى بيفكر و يستخدم عقله
اللى ربنا خلقه و كرمه و ميزه بيه ..
و لما سيدنا ابراهيم وصل للحقيقه
بدأ يدعى قومه يسيبوا اللى بيعبدوه
و يحاول يقنعهم ان الاصنام دى تماثيل لا بتسمع و لا بتتكلم و لا بتشوف
و لا بتضر و لا بتنفع
و لما لقى قومه مش ملتفتين لكلامه قرر انه يعمل حاجه
 و فى يوم عيد لهم خرج القوم كلهم بره البلد
و اعتذر ابراهيم بالمرض
و استنى و بعد ما مشيوا قام اخد فأس و طلع على المعبد
 دخل بص للتماثيل
 بصلها قرب منها
 نقى واحد
قاله ساكت ليه كسخريه يعنى ..
و رفع الفاس و كسر اول تمثال
و بدأ يكسر كل التماثيل فى المعبد
 و ساب اكبر تمثال فيهم مكسرهوش
 و بعد ما خلص حط الفاس على كتف التمثال الكبير و روح تانى ..
رجع القوم لقيوا تماثيلهم مدغدغه
 طبعا فزعوا و قالوا هينزل علينا اللعنه منهم
و جه الملك و كان اسمه النمرود
و بدأ يسأل مين اللى ممكن يكون عمل كده
فجماعه قالوا انهم سمعوا ابراهيم بيحتقرهم
و اكيد هو اللى عمل كده
 فطلب يجيبوه
 و لما جه سأله الملك
 انت اللى عملت كده ؟
فرد سيدنا ابراهيم لا ده كبيرهم هو اللى عمل كده
 اتخانقوا مع بعض فكسرهم بالفاس
فتعجب النمرود و قاله انت عارف ان دى تماثيل مش بتتحرك
 فقاله ازاى طيب تعبدوا حاجه مش بتتحرك و لا تقدر تدافع عن نفسها ؟ .. فسأله الملك طيب انت الاهك يفرق عن دول فى ايه
 قاله ربى يحيي و يميت
 فرد الملك قاله انا برضه اقدر احيي و اميت
هو انا مش ممكن اسيبك عايش و ممكن اموتك
فقال ابراهيم طيب ربنا بيخلى الشمس تيجى من الشرق
خليها انت تيجى من الغرب ..
اتصدم الملك من الجمله معرفش يرد
 و عشان معرفش يرد قرر ان ابراهيم لازم يتعاقب بالحرق بالنار
 و فعلا جمعوا اخشاب كتيره جدا و عملوا نار كبيره
لدرجه انهم من شدتها مكانوش قادرين يقربوا منها
و حدفوا سيدنا ابراهيم بالمنجنيق من بعيد
 و هو على المنجنيق اتاه سيدنا جبريل و سأله .. ألك حاجه ؟
 يعنى عاوز تطلب حاجه
فابراهيم رد منك انت لا
فربنا سبحانه وتعالى امر النار انها ماتحرقش سيدنا ابراهيم
مش بس كده تكون برد و سلام يعنى مايحسش اصلا بوجودها
 و اترمى ابراهيم فى النار و هلل قومه باعتبار النار حرقته و اتعاقب
 و بعد ايام لما النار اتطفت
 لقيوا سيدنا ابراهيم واقف فى وسط الخشب المحروق بيصلى
الحبال اللى كانوا رابطينه بيها اتحرقت
و هو فضل سليم حتى هدومه ما اتأثرتش و لا اتوسخت
 و برغم المعجزه الضخمه دى
 قومه فضلوا على كفرهم
و برغم من انه فضل يدعيهم للايمان محدش امن بيه
غير اتنين راجل و ست
و طلب سيدنا ابراهيم من ربنا الاذن يخرج من بلده
و يشوف ارض تانيه يدعى لربنا فيها
 و اذن له ربنا
و خرج مع سيدنا ابراهيم الاتنين اللى امنوا بيه ..
السيده ساره زوجته
 و سيدنا لوط ابن اخوه ..
و بدأ سيدنا ابراهيم رحلته لمصر
و هناك اهداه حاكم مصر جاريه اسمها هاجر
و بعدها اخدهم و راح على فلسطين .
……………………………………..

 

تصبحوا علي خير حبايبي الغاليين وبكرة نكمل الحكاية

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s