دُستور يا أصحاب المكان و الحكام
المقامات محفوظة وعارف إنكم في أعلى مقام
وإن مقامي زي ماهو بس أنا ليا معاكو كلام
نفسي أقولو!!.. ممكن أقولوا؟
طاب لو قولتو راح أخسر كام؟
كام من عمري ؟
كام من أمري ؟
أنا ف إيديكم بستسلم ما إحنا رعية وإنتم رُعاه
إنتم أحسن خلق الله .. إنتم من بإيديكم الأحكام
إنتم ناس للعدل أساس
إنتم طبعاً أجدع ناس
رافعين راسنا كما الأعلام
عدل وديمقراطيه والكُل سواء بجد أحسن ناس
وقبل صدور الحكم تشوفوا الحق فين بجد أحلى كلام
ولا كلامكم عن الحريه والسلام
بجد فرحني كتير وعلى الراس
أنا طول العمر أمير ومسالم
ماشى في حالي وربي العالم
طيب هادى وكله تمام
قولتو تبيع أخلاقك وتنسى ما كان
قولت موافق عمري سألت!! وقولت بكام؟
أما الناس التانيه ياما دخلت في حرب معاهم
لجل تكونوا بخير وسلام
المقصود أنا كنت في ضيافة شاعر زيي
وجاتلوا العدوه مات ياما وقال في كلام
قولت إستنى وحاسب يابني
لسه بيتنا بخير وتمام
جوايا قال لي الناس هتموت
م الجوع قولت يصوموا كام إسبوع هو الصوم دلوقت حرام ؟
دا اللي يصوم العمر بحالوا ياهنيالو
قاللي طوارئ قولت ومالو كل حمار ولازملو لجام
قاللي كفاية قولت ياساتر مالك بيهم دولا أكابر التغيير ولا فى الأحلام
إيه هايفيد من قولنا وقال دا إحنا ورانا بيوت وعيال
قال لي ياشيخ إتغطى ونام
بص ياساقط علم النفس
نص بناتنا في سن اليأس
وكلمة حقي بقت إجرام
فين العدل وفين الصحة والمخاليق بتموت
من كحة حتى البط جابولو زكام
والشهادات صبحت تذكار
والأفكار دايما فى حصار
عايز توصل تدفع كام؟
لما غلبني جيت أسألكم
وإعتبروني زي عيالكم
الرحمة بكام؟
العدل بكام؟
حفظ كرامة خلق الله دلوقت بكام ؟؟؟؟!!!!
…
محمود على احمد
